புதுடில்லி, மார்ச் 18 – மத்திய உள்துறை அமைச்சகம் வெளியிட்ட புதிய அறிக்கையில், நாட்டின் பாதுகாப்புக்கு அச்சுறுத்தும் 67 அமைப்புகளை தடை செய்துள்ளதாக அறிவித்துள்ளது. இதில் 45 அமைப்புகள் தீவிரவாத அமைப்புகளாகவும், 22 அமைப்புகள் சட்ட விரோத அமைப்புகளாகவும் வகைப்படுத்தப்பட்டுள்ளன.
தீவிரவாத அமைப்புகள்
நாட்டின் சுதந்திரத்துக்கும் பாதுகாப்பிற்கும் எதிராக செயல்படும் அமைப்புகள் மீது கடுமையான நடவடிக்கைகள் எடுக்கப்படுகின்றன. தற்போது 45 அமைப்புகள் தீவிரவாத அமைப்புகளாக வகைப்படுத்தப்பட்டுள்ளன. அவற்றில் குறிப்பிடத்தக்கவை:
தமிழீழ விடுதலைப் புலிகள் (LTTE) – இலங்கையில் தமிழர் விடுதலைக்காக போராடிய அமைப்பு, இந்தியாவில் பல்வேறு தாக்குதல்களில் ஈடுபட்டதாகக் குற்றம் சாட்டப்பட்டது.
தமிழ்நாடு விடுதலைப் படை & தமிழ் தேசிய மீட்பு படை – தமிழகத்தின் விடுதலைக்காக போராடிய சில அமைப்புகள்.
இந்திய கம்யூனிஸ்ட் கட்சி (மார்க்சிஸ்ட்-லெனினிஸ்ட்) மக்கள் போர் – ஆயுதமாய் செயல்படும் நக்சல் இயக்கத்தின் ஓர் அணியாக கருதப்படுகிறது.
லஷ்கர்-இ-தொய்பா, ஜெய்ஷ்-இ-முகமது, ஹர்கத் உல் முஜாகுதீன் – இந்தியாவின் பிராந்திய அமைதிக்கு பேரச்சுறுத்தலாக கருதப்படும் இஸ்லாமிய தீவிரவாத அமைப்புகள்.
அசாம் ஐக்கிய விடுதலை முன்னணி, காலிஸ்தான் ஜிந்தாபாத் படை – இந்தியாவின் வடகிழக்குப் பகுதிகளில் மற்றும் பஞ்சாப்பில் தீவிரமாக செயல்பட்ட அமைப்புகள்.
சட்டவிரோத அமைப்புகள்
22 அமைப்புகள் சட்டவிரோத அமைப்புகளாக அறிவிக்கப்பட்டுள்ளன. அவற்றில் முக்கியமானவை:
பாப்புலர் ப்ரன்ட் ஆப் இந்தியா (PFI) – சமீபத்திய காலங்களில் தீவிரவாத நடவடிக்கைகளில் ஈடுபட்டதாக குற்றம் சுமத்தப்பட்டது.
மக்கள் விடுதலை ராணுவம், தேசிய பெண்கள் முன்னணி, அகில இந்திய இமாம்கள் கவுன்சில் – சட்ட விரோத செயலில் ஈடுபடுவதாகக் கூறப்படும் அமைப்புகள்.
தடை விதிக்கப்பட்ட நடவடிக்கைகள்
இந்த அமைப்புகளின் வங்கிக் கணக்குகள் முடக்கப்படும். மேலும், இந்த அமைப்புகளுக்கு நிதி வழங்குதல், ஆட்சேர்ப்பு செய்யுதல் உள்ளிட்ட எந்தவொரு உதவிகளும் செய்தால், குற்றவாளிகளுக்கு கடுமையான தண்டனை விதிக்கப்படும்.
மத்திய அரசின் இந்த நடவடிக்கை, நாட்டின் உள்துறை பாதுகாப்பை மேம்படுத்துவதற்காக எடுக்கப்பட்ட முக்கியமான ஒன்றாக கருதப்படுகிறது. இந்தியாவின் பாதுகாப்பை உறுதிப்படுத்தும் விதமாக, எதிர்காலத்திலும் இத்தகைய அமைப்புகள் மீது தீவிர கண்காணிப்பு தொடரும் என அரசாங்கம் தெரிவித்துள்ளது.
